Goiriena De Gandarias Y Gandarias, Juan José

Juan José Goiriena de Gandarias y Gandarias (Gernika, 1948 - Bilbo 2020). Fisiologian katedraduna izan zen Euskal Herriko Unibertsitatean (EHU). Medikuntzan eta Kirurgian lizentziatu zen, Salamancako Unibertsitatean. Irakasle eta ikertzaile izan zen Oviedoko, Murtziako eta Euskal Herriko unibertsitateetan.

Bi ikerketa-lerro jorratu zituen nagusiki: esfortzuaren fisiologia kirol-medikuntzan, eta gantz-ehunaren metabolismoa.

Basurtuko Unibertsitate Institutu Medikua zuzendu zuen, Kirol-medikuntzan espezializatua; Europako Zientzia eta Arteen Akademiako eta Medikuntzako Errege Akademiako kide izan zen.

20 doktore-tesi zuzendu zituen; haietatik bostek sari berezia jaso zutelarik. 80 txosten eta ikerketa-lanen baino gehiagoren egilea izan zen, eta, haien artean, inpaktu handiko aldizkari hauetan argitaratuak nabarmen daitezke: British Journal of Pharmacology; Enzyme; Medicine & Science in Sports & Exercise; Journal of Applied Physiology, etab. Gainera, liburu ugaritan hartu zuen parte. Egin zituen azken ikerketa-lanen artean, txirrindularitzaren fisiologiarekin lotuak nabarmentzen dira, zeinak kirol arloko aldizkari garrantzitsuenetan (Sport Sciences) argitaratu baitziren.

Eusko Jaurlaritzako Osasun eta Kontsumo sailburuordea izan zen (1984-1987); baita Euskal Herriko Unibertsitateko errektorea (1991-1996), eta Eusko Ikaskuntzako presidentea ere (1996-2001).

Jaso zituen sarien artean, Doktore-tesiagatik (1973) eman zioten Sari Berezia eta UPV/EHUko Urrezko Domina aipa daitezke.

Juan José Goiriena jauna Jakiundeko kide izan zen Akademia 2007. urtean sortu zenetik.